Ika-100 taong anibersaryo ng Unibersidad ng Pilipinas kahapon. Gusto ko sanang pumunta sa campus para mailahok sa pagdiriwang, pero nang magising ako’y nasa kalagitnaan na ng selebrasyon sa Diliman. Sinundan ko na lang ang live updates ni JM sa Twitter (tingnan ang mga larawan sa blog niya; sa mga galing sa Google, sorry, walang oblation run pictures, hehe). Itinuloy ko rin ang pangongolekta ng URL ng UP bloggers para sa blog directory ng UPAlumni.net.

Balak ko sanang yayain si Mhay sa kampus pagkauwi ko galing opisina kagabi, pero kahapong umaga ko lang nalaman na ang Pamantasang Hirang centennial concert pala ay hindi sa UP gagawin, kundi sa Cultural Center of the Philippines. Eh kung sumugod man kami roon kagabi, baka pagdating namin ay puno na lahat ang 1,800 na upuan. Di na nga napagbigyan ang lahat ng mga hinihinging tiket ng mga opisina sa Diliman. Sabagay, hanggang bukas na gabi pa naman iyan.

(more…)

Lumabas ngayong araw, Hunyo 18, 2008, ang version 3 ng Mozilla Firefox, ang mabilis at mapagkakatiwalaang Internet browser na ginagamit ko at ng marami pang mga netizen sa mundo. Kasabay nito, humihingi ng tulong ang Mozilla, ang lumikha ng Firefox, upang maitala sa Guiness Book of World Records ang Firefox sa kategorya ng pinakamaraming downloads sa isang araw.

Sana ay makatulong kayo sa layuning ito. Kung wala ka pang Firefox, dapat mo itong subukan. Kung meron ka na naman, aba’y mag-upgrade na, i-click lamang ang banner sa ibaba:

Sa tweet ni Aileen ko unang nabalitaan ang paglaya nina Ces Oreña Drilon, Jimmy Encarnacion at Prof. Octavio Dinampo mula sa kanilang mga kidnapper, at nakumpirma ko ito sa mga balita ng abs-cbnNEWS.com. at GMANews.tv. Salamat sa Diyos at makakabalik na sila sa kanilang mga pamilya matapos ang siyam na araw.

Noong isang taon, lima sa sampung nominado ko — An Apple a Day, The Philosophical Bastard, The D Spot, CokskiBlue, at Gibbs Cadiz — ang napasama sa Top 10 Emerging Influential Blogs. Narito naman ang mga nais kong mapasama ngayong taon:

1. Among Ed - Blog ni Among Ed Panlilio, ang paring naging gobernador ng Pampanga matapos talunin ang mga kilalang traditional politicians. Samahan natin siya sa pagsusulong ng mabuting pamamahala. Tumulong ang aming grupo, ang Bloggers’ Kapihan, sa paglulunsad ng blog ni Among Ed sa Pampanga.
2. Jun Lozada - Ang “probinsyanong Intsik” na umamin sa mga sariling pagkakamali at ibinisto ang kabulastugan sa NBN-ZTE deal. Niyanig ng mga pahayag ni JLo ang trono ng reyna sa Palasyo. Daan-daang mga komento, kapwa papuri at panunuligsa, ang sumasalubong sa mga blog entry niya. Tumulong din ang BK Crew sa paglulunsad ng blog ni Among Ed sa Pampanga.
3. Bloggers’ Kapihan - Pagkatapos ng tatlong kapihan at dalawang blog launch, patuloy pa ring nagpaplano ang BK Crew — na kinabibilangan ko — ng mga susunod naming gawain. Sa pagitan ng mga kapihan, nagba-blog muna kami.
4. Mar Roxas for President in 2010 - Bilib ako sa dedikasyon ni Kevin Ray Chua, ang may-ari ng blog na ito, sa kanyang pagsuporta sa kababayan at idolo niyang si Mar Roxas. Walang pagod si Kevin sa pagpo-promote kay Roxas at sa kanyang campaign blog na trailblazer sa niche na ito.
5. Missing Carlo - Di rin naman masusukat ang pagmamahal ni Mica Rodriguez sa kanyang kapatid na si Carlo. Bukod sa pagiging talaarawan ng kanyang pangugulila sa kapatid, ang blog ay nagiging resource site rin para sa kondisyong autism. Ang Missing Carlo ay hosted ng aking proyektong Filblogs.com.

(more…)